L-Innu l-Kbir f’ġieħ il-Madonna ta’ Lourdes ta’ Mro Carmelo Scicluna (1903-1981)

Abstract

L-Innu Vokali u Strumentali ddedikat lill-Verġni Marija taħt it-titlu ta’ Lourdes huwa kompożizzjoni ta’ Mro Carmelo Scicluna (1903-1981) li huwa kiteb 75 sena ilu u li jġib id-data tat-30 ta’ Settembru 1947. L-innu, li għandu versi bil-Malti ta’ Dun Frans Camilleri (1919-1990), indaqq għall-ewwel darba mill-banda Qrendija fuq planċier ġdid taħt id-direzzjoni tal-kompożitur innifsu nhar il-11 ta’ Frar tas-sena ta’ wara b’tifkira tal-ewwel dehra tal-Madonna f’Lourdes fl-1858. Għal dan l-anniversarju speċjali, Nicholas Azzopardi, l-editur ta’ dan il-ktieb annwali, u f’isem is-Socjeta Filarmonika Lourdes tal-Qrendi, talabni biex ninsiġlu artiklu mużikali bil-Malti relatat mal-Banda Lourdes u l-Innu l-Kbir. F’din l-ewwel parti, fost affarijiet oħrajn, se ntikom tagħrif dwar l-oriġini ta’ dan l-innu Marjan u dwar il-protagonisti fuq imsemmija li bil-ħidma ta’ bejniethom tawna ġawhra oħra li kompliet tgħani r-repertorju bandistiku lokali.