Fil-Beraħ : l-esperjenzi tat-tfal tal-użu ta’ spazji pubbliċi [sett ta’ għodod : kif tinvolvi lit-tfal u liż-żgħażagħ fid-disinn ta’ spazji miftuħa]

Abstract

Jista’ jkun hemm diversi spazji pubbliċi f’viċinat li jinkludu l-madwar immedjat tal-viċinat, it-toroq, il-pjazez, il-parks lokali, l-ispazji għal-logħob tat-tfal u ambjenti naturali differenti. L-esperjenza ta’ spazji pubbliċi miftuħa hija importanti għat-tfal peress li tipprovdilhom l-ewwel opportunità indipendenti biex jiffurmaw relazzjonijiet ma’ nies li mhumiex membri tal-familja tagħhom. Dan is-sett ta’ għodod huwa prodott ta’ proġett ta’ riċerka li ppromwova r-riċerka parteċipattiva u ffoka fuq il-ġbir ta’ għarfien dwar il-fehmiet u l-esperjenzi tat-tfal dwar l-ispazju fuq barra fi ħdan il-lokalità tagħhom stess. Il-proġett kien jiddependi fuq il-parteċipazzjoni sħiħa tat-tfal u ż-żgħażagħ u l-metodi diversi adottati biex tinġabar id-data, kienu mmexxija mit-tfal. Dan il-proġett ta’ riċerka kien maħsub biex iservi bħala proġett pilota. Billi jiġu estrapolati l-prinċipji ġenerali segwiti u t-tagħlimiet meħuda, dan is-sett ta’ għodod ġie żviluppat biex jgħin lil oħrajn li jixtiequ jwettqu proġetti simili fejn it-tfal jistgħu jipparteċipaw fl-esplorazzjoni tal-użu, l-ippjanar u d-disinn ta’ spazji pubbliċi miftuħa. Il-lokalità magħżula għall-proġett intgħażlet minħabba popolazzjoni b’ħafna tfal, il-preżenza ta’ spazji blu u ħodor, u l-possibbiltà li offriet għad-disinn ta’ spazju miftuħ mit-tfal u ż-żgħażagħ.